ANG AMONG GOLDEN WEDDING ANNIVERSARY
Man proposes, but God disposes.
Thomas Kempis
German Canon
Taas gyod ang panahon nga gigahin sa among pamilya sa pagplano ug pagpangandam sa kasaulogan sa ika-50 ka tuig nga kaminyoon namo ni Pat sa Marso 18, 2020 nga tungod kay dunay klase ang kabataan, nasabotan nga himoon sa Marso 22.
Sa Oktubre 2019, gisugdan na ang paghisgot unsay buhaton ug ang pagpangita og pundo nga magasto. Kaming magtiayon nagsugod na paghimog listahan sa mga tawong dapiton.
Sa Disyembre 23 gihimo ang booking sa Roadhouse Café sa Valencia City. P174,000 ang bayronon sa 130 ka mga motambong. Ang package naglakip sa benyu, pagkaon, adorno gamit ang lab-as nga mga bulak, wedding cake, sound system, projector ug usa sa libreng lawak sa Double M Hotel nga iya sa tag-iya sa Roadhouse Café. Sa wala pa matapos ang bulan sa Disyembre, nahingpit na ang listahan sa mga ngalan sa 130 nga dinapit nga gipangunahan sa 26 ka mga maninoy ug maninoy.
Sa bulan sa Pebrero naprinta na ang invitation ug gisugdan ang pag-apod-apod niini. Naprinta sa usab ang misalet. Nakakuha nag pare mga magsaulog sa misa (si Rev. Fr. Mariano B. Chia nga mao sad ang pare sa among silver wedding). Nakakuha nag choir sa misa (Divine Mercy Choir), photographer ug videographer. Nakalukat nag tiket sa eroplano (PAL) nga sakyan sa pamilya ni Yoyong gikan sa Sydney paingon sa Cebu City sa Marso 2.
Sa Marso13, nahuman ang bedyu nga nag-ulohag “Eme & Pat: Paglahutay Luyo sa mga Pagsulay” nga gihimo ni Yoyong gamit ang teksto ug mga litrato nga akong gi-email kaniya.
Sa Marso 16, misakay ang pamilya ni Yoyong sa Lite Ferries kay nakansel ang ilang flight sa Cebu Pacific. Pagkaugma, gitagbo sila ni Ernest sa pantalan sa Cagayan de Oro ug miabot sa Valencia City nianang adlawa. Apan tungod kay gikan sa gawas, kaugalingnon silang nagkwarantinas sa balay nga among giandam.
Basta, andam na ang tanan. Ang mga sinina ug sapatos nga suoton ug ang duha ka wedding ring nga akong gidatadatahan. Apan may mga butang ug panghitabo nga dili kapugngan sa tawo. Ang katomanan sa among plano gihamok ug gihulga sa kalit nga pagtungha sa bag-ong matang sa coronavirus. Ang among kahinam gipulihan sa dakong kabalaka samtang adlaw-adlawng naminaw sa tiktak sa orasan sa COVID-19.
Sa hinapos sa Disyembre, 2019 usa ka misteriosong pneumonia ang gitaho sa Wuhan, ang kaulohan sa lalawigan sa Hubei, China. Sa tunga-tunga sa Enero, 2020 (kanus-a gasaulogon ang Chinese Lunar Year), gi-lockdown (walay makasulod ug makagawas) ang Wuhan nga may populasyon nga 11 milyon.
Ang coronavirus disease 2019 kun COVID-19, usa ka sakit nga ang sintomas mao ang hilanat, sip-on, ubo, kalisod sa paginhawa ug usahay, kalibanga. Kadaghanan sa nangamatay sa COVID-19 mga tigulang nga naa nay daang sakit sama sa sayabits, hayblas, kanser ug hubak. Ang sintomas mogawas sulod sa 2-14 gikan sa pagtakod. Walay vaccine ug tambal kontra sa COVID-19 gawas sa immune system sa tawo nga maoy makigbatok sa coronavirus. Aron sa paglikay sa pagpanakod sa sakit, himoon ang hustong paghugas sa kamot gamit ang sabon o kon walay sabon ug tubig, paggamit sa hand sanitizer; paglikay sa pagdikit sa ubang tawo (physical distancing); paggamit og tabon sa baba ug ilong kon may sip-on ug ubo; ug sa pagpuyo sa balay (self-quarantine).
Ang outbreak sa Covid-19 sa China daling mikanat sa ubang mga nasod hinungdan nga gideklara sa World Health Organization ang COVID-19 nga usa ka “pandemic”. Sa Marso 19, mikabat nas 209,000 ang kaso sa COVID-19 sa tibuok kalibotan nga ang kadaghanan gikan sa China ((81,300 ang nagkasakit ug 3,253 ang nangamatay).
Sa pagka Marso 20, ang Italy na ang nag-una sa daghang nangamatay (3,405), gilabwan ang 3,246 sa China. Ang panakod milapas nas 244,000 sa tibuok kalibotan. Sa Pilipinas, gitaho nga miabot nas 230 ang nagkasakit sa COVID-1919 ug 18 ang nangamatay. Si Gov. Jose Ma. Zubiri nagmando og lockdown sa lalawigan sa Bukidnon sugod sa tungang gabii sa Marso 21.
Seryosong nahisgotan ang kalagmitang pagkansel o pag-oktaba ang among golden wedding anniversary dihang sa Marso 8, gipirmahan ni Presidente Duterte ang Proclamation No. 922, “Declaring a State of Public Health Emergency” sa tibuok nasod tungod sa pagdagsang sa COVID-19 sa Pilipinas. Ug kini nakaaghat ni Mayor Azusena P. Huervas sa pagpagawas og mga giya unsaon pagpugong ug pagsumpo sa COVID-19 sa among lungsod. Ang Executive Order No. 17 nga gipakanaog sa Marso 9, 2020 wala magdili sa misa simbahan ug pribadong panagtigom, busa ang among pamilya naglaom gihapon nga mahinayon ang kasaulogan sa Marso 22. Gani, among gipahibalo ang tanang mga dinapit sa ipatoman nga mga lagda sa panahon sa kasaulogan: 1) walay dinapit gikan sa gawas sa Bukidnon gawas sa duha namo ka anak ug ang ilang pamilya; 2) ang tanan moagi sa thermal scanning ug hand sanitizing; 3) walay besobeso, lamanohay ug bendisyon o amen-amen; (4) walay bata nga ipasulod gawas sa among mga apo; 4) ipatoman ang physical distancing ug 5) hatagan ang nagdumala sa Roadhouse Café og listahan sa mga ngalan, adres ug kontak namber sa tanang motambong.
Nahanaw daw bula ang among paglaom nga mahinayon ang kasaulogan sa among ika-50 ka tuig nga kaminyoon dihang sa Marso 19 nagpagawas og kamandoan ang among mayor (EO No. 24) sa temporaryong pagsira sa tanang mga non-essential establishment ug sa pagpatoman sa community quarantine sulod sa dakbayan. Pagkasunod adlaw, among gitawgan ang Roadhouse Café nga dili na madayon ang kasaulogan.
Sa pagsulat niining artikulo (March 21), wala pay kaso sa COVID-19 sa Valencia City apan sumala sa taho sa Valencia Task Force Against COVID-19 adunay 193 ka mga PUM (Person Under Investigation) ug usa ka PUI (Person Under Investigation).
Mas importante ang kaluwasan sa sakop sa pamilya ug ubang tawo batok sa gikahadlokang coronavirus. Ang pagkansel sa kasaulogan sa among golden wedding among gihalad isip gamayng tampo ug sakripisyo sa pagsumpo sa pagkanat sa COVID-19 ug kini dakong kunsuylo sa dili lalim nga kasagmuyo nga gibati sa tibuok pamilya. Gawas pa, igo nang kadaogan ug dakong grasya sa Dios nga miabot sa 50 ka tuig ang among kaminyoon ni Pat nga sumala pa sa titulo sa bidyo nga unta ipasundayag sa panahon sa golden wedding anniversary, usa ka “Paglahutay Luyo sa mga Pagsulay”.
Akong taposon kining sinulat sa akong pamalandong mahitungod sa among kaminyoon ni Pat.
Ang gugma ug kaminyoon motunhay dili tungod kay gitakda na kini kondili tungod kay may duha ka binuhat ang nagkasabot nga kini ilang alimahan, panalipdan ug bugtawon.
Sa panalangin sa Ginoo nga nagbug-os sa magtiayon sa sakramento sa kasal, ang duha ka binuhat molampos sa ilang saad nga mag-inunungay “sa kalipay ug kasubo, sa kahimsog ug sakit, sa kabuhong ug kawad-on hangtod nga ang kamatayon mobulag kanato.”
Ang gugma sa magtiayon usa ka panaw sa tibuok kinabuhi. Usa ka maluntarong pakigsaad lahos sa mga katawa ug mga luha. Usa ka katumanan sa mga damgo nga puno sa katam-is sa pag-inambitay ug sa mga gutlo nga gikawilihan ug gihandom. Ang among kaminyoon ni Pat usa ka panawng gihadla sa dagkong mga balod sa pagsulay ug sa mga unos sa kasakit apan nagpabilin ang paglaom nga “. . . ang gihiusa sa Dios dili pagabulagon sa tawo.” (Mateo 19:6)
Uban sa panalangin sa Ginoo, milahutay ang among gugma ug pagminahalay. Nagpamalamposon kami sa among pagka ginikanan. Milambo ang among isprituhanong kinabuhi. Sa kilumkilom sa among panaw, nagpabilin ang damgo ug pangindahay sa dugang makahuloganong mga katuigan.
